Campus Ministry sa paaralan inorganisa

    Sa pagnanais na mahikayat at gawing mas aktibo ang mga kabataan sa mga gawaing ispirtwal at mas mapalapit sila sa Panginoon, sa kauna-unahang pagkakaton ay ikinasa ang pagbuo ng Campus Ministry sa Mataas na Paaralan ng Homapon matapos ang buwanang misa sa paaralan nitong Enero 19, 2024.

    Sa pakikipagtulungan ng Parish Commission on Youth ng Parokya ni San Roque, binuo ang ispirituwal na organisasyon ng mga mag-aaral mula sa iba’t ibang baitang sa paaralan.

    Ayon kay Fr. Rex Paul Arjona, ang parish priest sa naturang simbahan, isinagawa ang pagbuo ng campus ministry upang tugunan ang pangangailangang ispiritwal at emosyonal ng mga mag-aaral at maging ng mga guro.

    “Ang pagbuo ng Campus Ministry sa loob ng paaralan ay magsisilbing tulay sa pagitan ng akademiko at ispiritwal na aspekto ng pagkatao ng mga mag-aaral at kaguruan,” pagpapaliwang ni Fr. Arjona.

    Dagdag pa ni Fr. Arjona, ang pagtatatag ng Campus Ministry ay isang inobasyon upang mahikayat ang mga kabataan na iwasan ang mga gawaing labag sa kalooban ng Diyos. 

    “Ang Campus Ministry ay may mahalagang ambag sa buhay ng mga mag-aaral sa pamamagitan ng pagbibigay sa kanila ng pagkakataong makapag nilay-nilay at makapagdasal sa gitna ng mga pagsubok at depresyon na kanilang kinakaharap,” pagbibigay-diin ni Fr. Arjona.

    Ayon naman kay Punongguro Elvira Tusi-Belen, ang pag-organisa ng Campus Ministry ay makatutulong upang mas mapalalim pa ang paniniwala at pananampalataya ng lahat sa Panginoon kasabay ang pagpapahalaga sa kanilang akademikong pag unlad.

    Tinuran naman ni Rafael Bongais, gurong tagapayo ng Campus Ministry, na layunin ng organisasyon na magpatupad ng mga programang makatutulong na mas mahubog pa ang ispirituwal na paniniwala at pananampalataya ng mga Kristiyanong mag- aaral tulad ng lenten recollection, outreach program, youth encounter at prayer meeting.

| Fatima Nuza

Asignaturang Pananaliksik: Multipasakit sa mga Mag-aaral

    Kaalaman nga'y siksik sa pananaliksik, sa bigat naman nito'y bibitayin ka nang patiwarik.

    Sa pagpapatupad ng K to 12 curriculum, maraming mga asignatura ang inalis,
dinagdag, at pinalitan. Ngunit tila 'di masyadong nasuri ang mga asignatura sapagkat kung susuriin, nagkaroon ng multiplisidad ng mga asignaturang pananaliksik na halos magpatumbalik sa mga mag-aaral sa senyor hayskul.

    Apat sa 26 na asignatura sa Senior High School ay pare-parehong ukol sa pananaliksik. Kabilang dito ang Practical Research 1, Practical Research 2, Inquiries, Investigation and Immersion at Capstone Research para sa STEM. Sa dami nito ay hindi na halos magkandaugaga ang mga mag-aaral sa dapat na unahin; ang matuto, magpahinga, o pilitin pang isuksok sa isipan ang bultu-bultong aralin na hirap din silang unawain.

    Upang mahasa ang pag-iisip, kinakailangang magsaliksik. Ngunit sa pagkakataong ito, tila lumabis ang pagnanasa ng nakatatataas at pilit na tinatasa ang kritikal na pag-iisip ng mga mag-aaral makasabay lang sa pag-unlad ng mga karatig bansa.  Maganda man ang layunin nito, marapat  lamang na huwag ipagdikdikan sa mga mag-aaral ang sapilitang pagyapos sa multiplisidad ng mga akademikong gawain. 

  Tunay na marami ang magandang dulot ng asignaturang pananaliksik sa mga mag-aaral. Nagdadala ito ng mga makabagong ideya at humahasa rin sa pagkamalikhain ng mga mag-aaral. Magkagayon pa man, ang isa o dalawang asignatura sa pananaliksik ay sapat na. Ang kalabisan nito ay magdudulot lamang ng burnout sa mga mag-aaral.

Kamalayan sa Seksuwalidad

    Ang pagkakaroon ng kaalaman sa seksuwalidad ay mahalaga upang mas mamulat sa pagkatao at upang maging mas makatao. Kaya naman, ang pagpapatupad ng Comprehensive Sexuality Education (CSE) ng Kagawaran ng Edukasyon ay isang mabisang paraan upang matugunan ang kaalaman ng mga mag aaral patungkol sa sex education.

    Kung pagbabatayan ang DepEd Order No. 31 s. 2018, ang Comprehensive Sexuality Education Program ng DepEd ay naglalayong magbigay ng maayos at komprehensibong edukasyon tungkol sa mga aspekto ng seksuwalidad, kasama ang reproductive health, gender identity, consent, at iba pa. Sa pamamagitan ng programang ito, inaasahan na magkakaroon ng mas malawak na kamalayan at pag-unawa ang mga mag-aaral sa mga isyu ng seksuwalidad, pati na rin ang kahalagahan ng pagiging responsable at pagpapahalaga sa sarili.

    Bilang isang mag-aaral, malinaw na dapat bigyan ng pansin ang mga realidad sa kasalukuyang lipunan. Ang mga kabataan, kabilang ako, ay hindi maiiwasang maharap sa mga sitwasyon at usapin na may kaugnayan sa seksuwalidad. Ang kawalan ng tamang edukasyon at gabay ay maaaring magdulot ng maling pag-intindi, at pagkakamali.

    Sa aking pananaw, ang Comprehensive Sexuality Education ay isang mahalagang hakbang patungo sa pangkalahatang kaunlaran at kaligtasan ng kabataan. Hindi sapat na gawing limitado lamang sa tahanan ang edukasyon tungkol sa seksuwalidad, lalo na't hindi lahat ng mga magulang ay handa o may sapat na kaalaman upang magbigay ng tamang gabay.

    Ang edukasyon sa seksuwalidad ay isang karapatan at hindi dapat itong ipagkait sa aming mga kabataan. Sa halip na matakot at magpahayag ng pagtutol, dapat nating tingnan ang CSE Program bilang isang pagkakataon upang palawakin ang ating kaalaman at pag-unawa upang maging mga responsable at maalam na mamamayan.

Catch-up FAILdays: IBA PA RIN ANG HANDA

    Kung hindi napaghandaan ang programang magpapausad sana sa sistema ng ating edukasyon, tiyak ang napag-iwanan ay mananatiling nasa hulihan.

    Nakapanlulumo ang paulit-ulit na lang na napag-iiwanan. Sa nakaraang resulta ng Program for International Students Assessment (PISA) ay pumangalawa mula sa hulihan ang Pilipinas. Maging sa Trends in International Mathematics and Science Studies (TIMSS), nasa hulihan pa rin ang bansa. Kung kaya’t pinagsusumikapan ng Kagawaran ng Edukasyon (DepEd) na gawing hakbang ang Catch-up Fridays upang paunti-unting umangat ang kalidad ng edukasyon sa bansa. 

    Inilabas ng DepEd ang Memorandum Blg. 1, s. 2024 o mas kilala bilang Catch-up Fridays  nito lamang Enero 12 sa pagnanais na matamasa ang edukasyong de-kalidad, nauukol, inklusibo, at tumutugon sa pangangailangan ng bawat Pilipinong mag-aaral. Nakasaad din sa programa ang pagpapaigting sa foundational, social at iba pang mahahalagang kasanayan para sa mga mag-aaral upang maisakatuparan ang pangunahing layunin ng batayang edukasyon- ang magkaroon ng sapat at mahusay na kalinangan. Bibigyang- diin rin ng Catch-Up Fridays  ang edukasyong pagpapakatao, pangkalusugan, at pangkapayapaan na tila nakalimutan na ng henerasyong ito.

    Walang masama sa pagnanais ng nakatataas na Kagawaran na makahabol o 'di kaya naman ay mahigitan pa ang mga karatig nating bansa pagdating sa mga internasyonal na pagtataya. Ngunit sa pagmamadaling makahabol, tila nawala sa proseso ang salitang "paghahanda" bago ang implementasyon nito. Huwag naman sanang ipagsiksikan pa sa mga kaaba-abang guro at mag-aaral ang Catch-up Fridays kung hindi pa tiyak ang direksyong tatahakin ng programa.

    Alalahanin sana ng pamahalaan na salat sa pinansyal na suporta at kagamitan ang mga pampublikong paaralan. Ito ay binigyang punto ng Teachers’ Dignity Coalition (TDC) sa isang panayam matapos mabigo ang Kagawaran na maglaan ng sapat na kagamitang kinakailangan sa pagsasakatuparan ng mga layunin ng Catch-up Fridays. Labag man sa kalooban ng ilang guro, kinakailangan nilang tustusan ang kakulangan sa kagamitan ng mga mag-aaral masunod lamang ang layunin ng huwad na programa sa edukasyon. Malinaw na hindi hakbang sa pagkamit ng maayos na edukasyon ang agarang pagpapatupad ng isang programang hindi napaghandaan. Sa halip, iniiwan lamang nitong butas ang bulsa ng mga guro.

    Hindi masamang humabol kapag napag-iiwanan kung isasaalang-alang ang kahandaan sa pagpapatupad ng isang programa tulad nitong Catch-up Fridays. Hindi matutuldukan ng agarang pagpapatupad ng programa ang halos isang daang taon ng sakit sa sistema ng edukasyon. Sa halip na makahabol ang bansa mula sa hulihan, baka tayo ay mas lalong malugmok sa ibaba.

| Mary Rose Baldon

Pinakamahuhusay na scout kinilala sa school encampment

Kinilala sina Kent Daniel Argote at Riana Atuli, parehong mag-aaral sa ika-10 baitang, bilang pinakamahusay na boy scout at girl scout ng paaralan sa ginanap na school encampment nito lamang Enero 12-13, 2024.

    Inabot ng halos limang taon bago muling ginanap ang school encampment dahil sa pandemya.

    Nilahukan ang nasabing encampment ng 101 Homaponian na kasapi ng Boy Scouts of the Philippines (BSP) at Girl Scouts of the Philippines (GSP) sa dalawang araw na school encampment.

    “Matagal nang ninanais ng mga scout sa paaralan ang muling pagkakaroon ng school encampment kung kaya marami agad ang nagpakita ng interes na dumalo sa unang araw pa lamang na ianunsyo ang gawaing ito,” paglalahad ni Adrian Nocellado, senior scout at Pangulo ng Supreme Secondary Learner Government (SSLG).

    Pinamunuan nina Noel Perez at Jen Rentoy, kapwa guro, ang school encampment kasama ang mga opisyales ng SSLG.

    Ayon kay Perez, sinubok ang diskarte, tiyaga, determinasyon, at pagkakaisa ng bawat pangkat ng mga scout sa dalawang araw ng encampment. 

    Ang mga gawain at performans ng bawat scout sa encampment ang pinagbatayan ng pagpili ng pinakamahusay na kasapi ng BSP at GSP.

    “Magsilbi sanang inspirasyon sa lahat ng mga kapwako scout ang pagkilalang binigay sa akin at nawa’y isapuso at isakilos ang pagiging isang tunay na boy scout,” pahayag ni Argote.

| Charlene Reñevo