Akademikong pananaliksik nailathala sa internasyunal, Kultura ng riserts sa paaralan mas pinalawak

Sa kauna- unahang pagkakataon, nailimbag ang isang akademikong pananaliksik mula sa Mataas na Paaralan ng Homapon sa internasyunal na lebel matapos mailathala ang pag-aaral ni Jean Pauline Pocaan, guro sa senyor hayskul, ng  Association of Southeast Asian Teacher Education Network (ASTEN) sa kanilang internasyunal na journal nitong Disyembre 28, 2023.

    Dumaan sa mahigpit na proseso bago mailathala ang pag-aaral ni Pocaan na may pamagat na “Social Support Systems and Needs of Private SHS Teachers in Writing Research”.

    “Bago pa man matanggap ang aking lokal na pag-aaral ng ASTEN, dumaan muna ito sa sa ilang ulit

na komprehensibong pagrerebisa batay sa mga komento ng kapwa ko mananaliksik sa ibang bansa kung kaya isang karangalang maituturing ang mailathala ito sa mga Scopus Indexed Journal tulad nito,” pagpapaliwanag ni Pocaan.

    Maaaring ma-access ang akademikong pananaliksik ni Pocaan sa mga kilalang platform online tulad ng ResearchGate at Google Scholar.

    Ayon naman sa punongguro, Elvira Tusi-Belen, pinapahalagahan ng paaralan ang akademikong pakikilahok ng mga guro lalong lalo na sa larangan ng pananaliksik.

    Matatandaan na bago pa man nailathala sa internasyunal na platform ang pag-aaral ni Pocaan ay may dalawa pang lokal na pananaliksik ang nagawa ng iba pang guro na sina Kharla Jane Estrada at Edgar Arciga Jr, parehong guro sa senyor hayskul, noong 2019.

    Pinondohan ang pag-aaral nina Estrada at Arciga ng Lokal na Pamahalaan ng Lungsod ng Legazpi gamit ang Special Education Funds.

    “Naniniwala ang paaralan na kapag aktibo ang mga guro sa pananaliksik, sila ay makatutulong upang maging mas epektibo at dekalidad ang edukasyong binibigay ng paaralan sa mga mag-aaral at maging sa buong sektor ng edukasyon,” dagdag pa ni Belen.

    Mas palalawigin pa ng paaralan ang mga pagkakataong maging bahagi sa mga akademikong pananaliksik hindi lamang ang mga guro kundi maging ang mga mag-aaral.

| James Rapirap

Homaponians wagi sa lokal, internasyonal na patimpalak

    Umuwi ng karangalan ang mga piling mag-aaral ng Mataas na Paaralan ng Homapon matapos nilang manalo sa iba’t ibang kompetisyon mula dibisyon hanggang internasyonal na lebel sa unang tatlong kwarter ng taong panuruan 2023 - 2024.

    Umarangkada si Jilliane Mae Bitara ng 11-ABM sa mga kompetisyon sa matematika ngayong taon kabilang ang pagkilala bilang Merit Awardee sa International Vedic Mathematics Olympiad nito lamang Nobyembre 5, 2023.

    Pumangalawa rin si Bitara sa Math Device kasama si Jenica Joy Mirabueno sa ginanap na 2023 Division Mathematics Fair nitong Disyembre 9, 2023.

    Kinilala rin bilang Merit Awardees sina Bitara, James Rapirap, at Angel Lucero sa 4th Philippine National Vedic Mathematics Olympiad nitong Oktubre 7, 2023.

    “Malaking tulong ang MATH Plus, isang komprehensibong pagsasanay sa matematika ng paaralan, upang mas mahubog ang aking kasanayan sa matematika at manalo sa mga patimpalak,” pahayag ni Bitara.

    Bumida rin sina Ailyn Zamora ng baitang 10 at Rommela Faye Alamil nang makuha ang ikatlong pwesto sa provincial elimination ng Regional Consumerism Challenge nitong Oktubre 16, 2023.

    Kinilala rin sina Rona Apuyan at Roselle Maravilla, parehong mag-aaral sa Baitang 12, matapos nilang masungkit ang ikalawang pwesto sa pagsulat ng rawit-dawit at sanaysay sa ginanap na Araw ng Kabataan sa Lalawiga ng Albay nitong Agosto 31, 2023.

| Blessy Alegre